ዋሽንግተን ዲሲ —
የደቡብ ሱዳን የአማጽያን መሪ ሪያክ ማቻር ፕረዚዳንት ሳልቫ ኪር በሀገሪቱ 28 ክፍላተ-ሀገር እንዲኖሩ ለማደረግ ማቀዳቸውን በመቃወም ጉዳያቸውን ለአፍሪካ ህብረት ለማቅረብ ወስነዋል።
የተቃዋሚው ቡድን የሱዳን ህዝባዊ ሀርነት ንቅናቄ የውጭ ጉዳይ ሃላፊ ኢዝየል ሎል ጋቶኩት(Ezeliel Lol Gatkuoth) ማቻር ከነገ ጀምሮ እስከ መጪው ቅዳሜ ድረስ በሚቆየው የአፍሪካ ህብረት ጉባኤ ላይ ተገኝተው የአፍሪካ መሪዎች ሳልቫ ኪር 28 ክፍላተ-ሀገር ለመመስረት ያለቸውን እቅድ እንዲተው እንዲነግሯቸው ጥሪ አደርጋለሁ ብለዋል።
ሳልቫ ኪር ባለፈው ጥቅምት ወር ባወጡት አዋጅ በሀገሪቱ 28 ክፍላተ-ሀገር እንደተመሰረቱ አስታውቀዋል። በፊት ግን 10 ክፍላተ-ሀገር ናቸው የነበሩት።
ውሳኔው የተደረገው በደቡብ ሱዳን የሽግግር ህገ-መንግስት በመመራት ነው ብለዋል ፕረዚዳንቱ። አላማውም ማዕካላዊ አስተዳደሩን ለማላላት እንደሆነ ሳልቫ ኪር ሲያስረዱ የብሄራዊ መንግስቱን መጠን በመቀነስ ሀብቱ ለገጠሩ ነዋሪ ቀረብ እንዲል ለማደረግ ነው ብለዋል።
